Moin, ik bün Marcus Buck un ik bün siet 2023 stolten Vader von en Söhn! Ik schriev düsse Regen in’n Laatsommer 2024 un mien Söhn snackt noch nich. Dat schall sik in de tokamen Maanden woll ännern. Ik sülvs snack nu al jümmer mit em Platt. Un ik hööp, dat he dorbi ok dat Plattsnacken lehrt. To düsse Tiet in’t Kinnerleven höört ok dat Vörlesen. Dat schall nu natürlich ok op Platt ween. Un dorüm heff ik en Barg Kinnerböker op Platt köfft. He schall ja jeden Avend wat vörleest kriegen.

Düsse Websteed schall annere Öllern (un Grootöllern, Schoolmeesters etc.) en Hülp an de Hand geven, üm de plattdüütschen Kinnerböker to finnen, de to di un dien Kind passt.

Mehr to mi: ik bün 1982 boren un op de Stoder Geest in dat Dörp Brobargen opwussen. De Oort liggt in’t Binnenland, aver an’t Dörp flütt de Oost langs, de hier Ebb un Floot un en Diek mit Schaap hett. Also dröff ik mi woll Küstenkind nömen. Opwussen bün ik op en Buurnhoff mit Keih un Kattenvolk. Mit Oma un Opa ünner een Dack heff ik mien Leevdaag jümmer Plattdüütsch höört. Sülvens snacken, dor heff ik aver en lütten Schubs von mien Opa för bruukt. Later hett dat Kind studeren lehrt op Computer. Ik arbeid nu in’n IT-Support. As Hobby bedriev ik de Websteed Plattmakers.de mit en plattdüütsch Wöörbook un en Literatursöök. Dat do ik al Stücker wat Johren. Kinnerbook.de is en Aflegger von de Literatursöök op Plattmakers.de, de sik nu speziell mit de Kinnerböker befaat.